PILAY POSIBLENG OS-OS SA PRESYO’S KURYENTE

SAYOP ang pag-ingon nga ang Order sa Energy Regulatory Commission (ERC) para lang sa Bohol Light Company, Inc. (BLCI) ug way labot ang Boheco I ug Boheco II.

Sayop pod ang estorya nga P5 matag kilowatthour (kwh) ang ikunhod sa presyo’s kuryente nunot sa ERC Order nga giluwatan niadtong Agosto 1.

Ang ERC nagmando sa Philippine Electricity Market Corporation (PEMC) ug Independent Electricity Market Operators of the Philippines (IEMOP) sa pag-refund ngadto sa tulo ka mga distribution utilities (DU) ug mga konsumidor sa Bohol.

Sa banabana sa BLCI, P2.90/kwh ang os-os sa presyo’s elektrisidad—o gikan sa kapin kon kulang (more or less) P11/kwh ngadto na lang sa P9/kwh kapin kon kulang.

Human gyod sa arangkada nilang Gob. Arthur Yap ug Kong Edgar Chatto sa ERC sa Manila sayo sa Hulyo, napakunhod dayon ang power rate gikan sa kapin kon kulang P13/kwh ngadto sa P11/kwh kapin kon kulang.

Sa laing pagkasulti, human nibarug ang mga lider sa Bohol didto sa ERC, ang presyo’s kuryente dinhi ni-os-os gikan sa P13/kwh ngadto sa P11/kwh—ug moubos pa gyod hangtud sa P9/kwh inig patuman sa ERC order.

Gipaabot ang estimate gikan sa duha ka Boheco basi usab sa mando sa ERC.

Di maayong ipalakaw ang estorya nga mokunhod pa og P5/kwh ang presyo sa elektrisidad dinhi tungod sa ERC Order sa Agosto 1.

Kay P2.90/kwh ang banabana sa BLCI nga kunhod nunot sa ERC Order, masuko ang mga tawong mailad nga P5/kwh kuno ang os-os.

Kini maoy gustong mahitabo sa mga intrigador nga, hangtud karon, gitakigan pa’s resulta’s eleksyon sa Bohol.

Kon modako pa ang kunhod, mas maayo hinuon. Apan di nato hilo-an ang utok sa katawhan aron palagoton.

Ayaw pakasuk-a ang mga tawo sa inyong ilad. Kasuk-i ang inyong kaugalingon nganong pangilad ray inyong buhat.

KINI ANG ATONG BANTAYAN: Daghan gihapon ang nagping-it sa tumang kasina ngadto sa mga lider sa Bohol nga tinud-anayng naglihuk.

Every impact accomplishment of Bohol’s truly working leaders is charcoal that burns in the mouth of their rabid critics.

Di gyod sila kadawat niini. Gawas nga makahilos sa ilang dila, makasunog pa’s tango—nga abot sa sungay!

Permanent link to this article: http://edcombohol.com/pilay-posibleng-os-os-sa-presyos-kuryente/

3 comments

  1. Like!! Thank you for publishing this awesome article.

    • Howard on August 13, 2019 at 8:15 am

    Thanks I needed this

Leave a Reply

Your email address will not be published.